För de letzde Tosamenkunft in disse Joahrhabben wi dat Füürwehrmuseum in Jever utkeeken, Haast all Kameraden kunnen deelnähmen, un so fuhren wi um 2 Ühr s´namiddags van´t Füürwehrhuus off. Eenig oll Kameraden ut Haag harrn ook Interesse un schloten sük uns an.

So um 3Ühr weern wi denn in Jever un wuurn van de Museumsbesatzung in Empfang nahmen. Dat Gebäude van buten stell heel neet so vööl vör; wi wurrn naderhand gewohr, dat dat mal een Hall van de Isenbahn west weer. 

As wi denn na binnen kwemen, weern wi all mitnanner awerrascht, wat de Jeveraner Kameraden ut dat Gebäude maakt hebben.  As eerst gung dat los mit Tee und Kook an een heel mooi gedeckten Teetafel – sogoarmit Jeverschen Leidenschaften.

Twee Kameraden wiesten un verkloarten uns de Utstellen: dat gung van de eerste Alarm – Einrichtung van froher bit nu aver Feuerlöscheinrichtungen, Atemschutz, oll Uniformen un  Helmen bit na de oll Füürwehr foahrtügen, sogar een Dreihledder van´t Füürwehrschool in Loy. Na disser Besichtigung kregen wi noch ´n anner Halle to sehn, in de noch mähr Löschfoahrtügen stunnen. Dorbi vertellten uns de Kameraden, dat in denächste Joahren noch een grotede Anboo plant is.

Na disse heel interessante Besichtigung fuhren wi all mitnanner na Schwittersum un seeten noch gemütlich tosamen in de Gastwirtschaft „Windstärke 12“. Na lecker Äten un Drinken weren wi all blied awer de mooje Namiddag. – Uns nächste Tosamenkunkt is de Wiehnachtsfier am 2.Advent,  4. Dezember 2011, in d´Lütsböger Bummert, worto wiall mit uns Füürwehrfroolü inladen sünd.

Gerda und Heino Schmull hebben weer all upschreben,

Helmut Heuermann hett de Billers maakt.